A EDUCACIÓN É / E ALGO MÁIS

sábado, 5 de novembro de 2016

A ponte de Rande é unha construción civil que atravesa a ría de Vigo, unindo a Península do Morrazo no lado norte coa comarca de Vigo na beira sur. Forma parte da autoestrada do Atlántico e é un dos emblemas da Ría de Vigo e Galiza.

As obras de construción comezaron a finais do ano 1973, coa colocación da primeira pedra o 17 de decembro, e duraron ata o ano 1977, aínda que a ponte non se abriría ao tráfico ata catro anos despois, o 7 de febreiro de 1981, debido a que as prolongacións dos accesos a terra non quedaron rematadas ata ese ano. O seu custo foi de 3.658 millóns de pesetas da época e o proxecto orixinal é dos enxeñeiros Fabrizio de Miranda, Florencio del Pozo e Alfredo Passaro.

Actualmente soporta un tráfico de mais de 50.000 vehículos ao día. Dende a súa apertura ao tráfico en 1981 xa pasaron por ela máis de 230 millóns de vehículos. Por mor deste intenso tráfico está prevista a súa ampliación [3] cun carril mais por sentido polos lados exteriores da ponte, que serían exclusivos para o acceso aos vehículos con orixe e destino a Península do Morrazo. No mes de febreiro de 2015 comezaron as obras para facer realidade este proxecto de ampliación, cun investimento estimado de 107,9 millóns de euros.